အောက်ဆီဂျင် မီတာဗူးကို ဖွင့်ဖောက်ပါ။

အထဲတွင် အောက်ပါ ပစ္စည်းသုံးခု ပါဝင်ပါမည်။ (မီတာပါအပိုင်း+ရေထည့်ဗူး+လေရှူပိုက်)

ရေထည့်ဗူးကို မီတာပါအပိုင်းနှင့် တပ်ဆင်ရာတွင် မီတာဒိုင်ခွက်ပါသည့် အပိုင်းရှိရာဘက်သို့ ရစ်၍ အရစ်ဆုံးသည်အထိ သေချာကြပ်ရမည်။

အောက်ဆီဂျင် ဗူး၏ ပိုက်ခေါင်းတွင် မီတာအား ဂွရှင်ကို အသုံးပြု၍ အောက်ဘက်သို့ရစ်၍ အရစ်ဆုံးသည်အထိ သေချာတပ်ဆင်ပါ။

ရေထည့်ဗူးအား မီတာဒိုင်ခွက်၏ ဝေးရာဘက်သို့ အရစ်လှည့်ဖွင့်ပြီး ရေသန့် တစ်ဝက်ခန့် ဖြည့်ပြီး ပြန်လည်တပ်ဆင်ပါ။

အောက်ဆီဂျင်ဗူးတွင်ပါသော အဖွင့်အပိတ်ဘားအား မီတာဒိုင်ခွက်ရှိရာဘက်သို့ သုံးပတ်ခန့် လှည့်ဖွင့်ပါ။

ဒိုင်ခွက်ရှိမျှားတံသည် အောက်ဆီဂျင်လက်ကျန်အား ပြသပြီဆိုပါက မီတာရှိ (Shut & Open) စာတန်းပါ အရှိန်နှုန်းထိန်းသည့် ခလုတ်အဝိုင်းအား မီတာဒိုင်ခွက်၏ ဝေးရာဘက်သို့ ဖြေးညှင်းစွာ လှည့်ဖွင့်၍ ဆရာဝန်ညွှန်ကြားထားသည့် မိမိလိုအပ်သော ပမာဏကို ချိန်ညှိပါ။

မီတာဒိုင်ခွက်ဘေးရှိ အရှိန်နှုန်းပြ ဖန်ပြွန်ချောင်းထဲတွင် ဘောလုံးအသေးလေးသည် သင်ချိန်ညှိိသည့်အတိုင်း ထက်အောက် တက်လိုက်ကျလိုက်ဖြင့် ပြသနေလိမ့်မည်။

ဆရာဝန်၏ သီးခြားအကြံပြုချက် မရှိပါက ပုံမှန် 2/3 လောက်သာထားရှိ၍ အသုံးပြုရန် အကြံပြုလိုပါသည်။ ဆရာဝန်ညွှန်ကြားမှု မပါလျှင် 5နှုန်းထက်ကျော်လွန်၍ အသုံးမပြုပါနှင့်။

ရေထည့်ခွက်ရှိ ရေများပလုံစီထ၍ မီတာ၏ လေထွက် ပေါက်မှ လေထွက်သံစကြားရပြီဆိုလျှင် ရပါပြီ။ ထိုအချိန်မှ မီတာရေထည့်ဗူး လေထွက်ပေါက်တွင် လေရှူပိုက်တပ်ဆင်၍ အသုံးပြုပါ။

အောက်ဆီဂျင် ပေးလျှင် ပစ်ထား၍ မရပါ။ မကြာခဏ တိုင်းကြည့်ကာ လိုအပ်လျှင် အတိုးအလျှော့ လုပ်ပေးပါ။

အောက်ဆီဂျင်အိုး ကုန်/မကုန် အမြဲ စစ်ကြည့်ပါ။ အောက်ဆီဂျင်ကို တွက်ဆပြီး အိုးအလုံအလောက် ရှာထားပါ။ ၂၄နာရီပြည့်တိုင်း ရေအသစ်လဲပေးပါ။ ရေသန့်ကိုသာ ထည့်ပါ။

အသုံးပြုပြီးလျှင် မီတာရှိ (Shut & Open) စာတန်းပါ အရှိန်နှုန်းထိန်းသည့် ခလုတ်အဝိုင်းအား အရင်ပိတ်ပါ။ (ဘောလုံးလေး အောက်သို့ ကျသွားရပါမည်။)

ထို့နောက် အောက်ဆီဂျင်အိုးတွင် ရှိသော ခလုတ်ကို တင်းကြပ်စွာ ပိတ်ပါ။ ရေခွက်ထဲတွင် ဆူနေသော ရေများ/ရေပူဖောင်းလေးများ ရပ်သွားသည်အထိ ပိတ်ပါ။

အောက်ဆီဂျင်အိုးအား မီးဖို၊ မီးနှင့်ပတ်သက်သော ​နေရာ​များနှင့် ​ဝေး​ဝေး ထား​ပေးရပါမည်။ ဓါတ်ဆီ၊ ဒီဇယ်၊ စားဆီ၊ ​ခေါင်းလိမ်းဆီ အစရှိသော ဆီများနှင့် လုံးဝမထိမိ​အောင် ထားပါ။

အိုးနားမှာ ​ဆေးလိပ်မ​သောက်ရပါ။ အနီးအနားတွင် ဖယောင်းတိုင် မထွန်းရပါ။ အောက်ဆီဂျင်သည် ကိုယ်တိုင် မီးမ​လောင်နိုင်သော်လည်း မီးလောင်ခြင်းကို အား​ပေးသောကြောင့် သတိပြု ဆင်ခြင်ရပါမည်။

အောက်ဆီဂျင်အိုးကို လဲမကျစေရန် ခိုင်မာသော အရာတစ်ခုခုမှာ ချည်​နှောင်ထားရပါမည်။

လေဖြည့်ထားသော ​အောက်ဆီဂျင်အိုးသည် အတွင်းထဲမှာ ​လေ​ပေါင် pressure 1800psi ရှိသည့်အတွက် ​လေရှိ​နေသော အိုး​တွေကို ထုရိုက်ခြင်း၊ ကြမ်းကြမ်းတမ်းတမ်း ပစ်ချခြင်းများကို ​ရှောင်ကြဥ်ရပါမည်။

အောက်ဆီဂျင်အိုး အသုံးပြုနည်း သရုပ်ပြ ဗီဒီယို