အောက်ဆီဂျင်စက် (Oxygen Concentrator) အသုံးပြုနည်း သရုပ်ပြ ဗီဒီယို

Oxygen Concentrator ကို သယ်ယူရာတွင် ဖြစ်စေ၊ သိမ်းဆည်းထားရှိလျှင် ဖြစ်စေ ဒေါင်လိုက် အနေအထား အတိုင်းထားရှိပါ။ (Packing box ပါ ⬆️ မြားအတိုင်း)

လျှပ်စစ်ဓာတ်အား အတက်အကျရှိလျှင် (သို့မဟုတ်) မီးစက်ဖြင့် အသုံးပြုရလျှင် 1KVA အထွက်ရှိသော အလိုအလျောက် မီးအားမြှင့်စက် (Automatic Voltage Regulator) ကို ကြားခံ အသုံးပြုပါ။

စက်ကို နံရံ (သို့မဟုတ်) ပရိဘောဂ ပစ္စည်းများနှင့် အနည်းဆုံး ၄လက်မ ခန့်ခွာထားပါ။

စက်၏ လေဝင်လေထွက်ပေါက်များကို မပိတ်ဆို့စေဘဲ ဖုန်၊ အမှိုက်၊ ဆံခြည်များ မဝင်‌အောင်ထားရှိပါ။ ပျော့ပြောင်းသော မျက်နှာပြင်များ၊ မွေ့ယာ၊ ဆိုဖာများပေါ်တွင် မတင်ရပါ။

စက်ကိုအသုံးပြုနေစဉ် ဆေးလိပ်၊ မီးပွား၊ မီးတောက်များ အနီးအနားတွင် မရှိစေရပါ။ ပေါက်ကွဲလောင်ကျွမ်း တတ်ပါသည်။

ဆီ၊ စက်သုံးဆီ၊ ချောဆီများကို စက်၏ မည်သည့် အစိတ်အပိုင်းနှင့်မျှ မထိတွေ့ပါစေနှင့်။

စက်ရပ်ပြီး ပြန်ဖွင့်ရန် အနည်းဆုံး ၅မိနစ်ခန့်ခြားပါ။ စက်ဖွင့်ပြီး အသုံးပြုချိန်သည် အနည်းဆုံး မိနစ် ၃၀ ရှိသင့်ပါသည်။

သာမန်အားဖြင့် လူနာ၏ အခြေအနေအရ စက်ကို ဆက်တိုက် အသုံးပြုနိုင်ပြီး စက်အသုံးပြုချိန် ၈နာရီပြည့်တိုင်း ၁၅ မိနစ်ခန့် အနားပေးလျှင် စက်၏သက်တမ်း ပိုရှည်ပါသည်။

စက်အတွင်းရှိ လေစစ်ဇကာကို အသုံးပြုချိန် အနည်းအများ ပေါ်မူတည်ပြီး ဆေးကြောပေးပါ။

အပြင်ဇကာကို နှစ်ပတ်တစ်ခါ ဆေးကြောပါ။ အတွင်းဇကာကို တစ်လတစ်ကြိမ် ဆေးကြောပါ။ ဇကာများကို ခြောက်သွေ့အောင် ထားပြီးမှ ပြန်လည် တပ်ဆင်အသုံးပြုပါ။ ဇကာများ မတပ်ဆင်ဘဲ စက်ကို လုံးဝ အသုံးမပြုရပါ။