အောက်ဆီဂျင်စက် အသုံးပြုနည်း နှင့် သန့်ရှင်း ထိန်းသိမ်းနည်း သရုပ်ပြ ဗီဒီယို

စက်ကို ပထမတစ်ယောက်သုံးပြီး နောက်တစ်ယောက် မသုံးခင်မှာဖြစ်စေ၊ အခြားနေရာမှ သယ်ယူလာသည်ဖြစ်စေ ပိုးသတ်ပြီးမှသာ သုံးစွဲပါ။

အကောင်းဆုံးမှာ အနည်းဆုံး (၅) ရက်ခန့်ထားပြီး ပိုးသတ်ပြီးမှသာ နောက်လူနာ တစ်ယောက် သုံးသင့်ပါသည်။

ပိုးသန့်စင်မည့်သူသည် အခြားသူများနှင့် ဝေးရာမှာ mask, face shield/goggles (အကာအကွယ် မျက်မှန်), လက်အိတ်များ စနစ်တကျ ဝတ်ဆင်ပြီးမှ ပိုးသန့်စင်ပါ။

(၁) စက်အပြင်ပိုင်းကို အစွန်းချွတ်ဆေး မပါသော ဆပ်ပြာရည် စိမ်ထားသည့် အဝတ်ဖြင့် သုတ်ပါ။ ထို့နောက် kitchen tower စက္ကူလိပ် (သို့မဟုတ်) အဝတ်သန့်ဖြင့် ရေများကို ပြန်သုတ်ပါ။

လက်ဖြင့် ထိတွေ့နိုင်သော နေရာများ (ဥပမာ - လက်ကိုင်၊ setting ချိန်သောနေရာ) ကို အဓိက ပိုးသန့်စင်ပေးပါ။ စက်ကို အသုံးပြုနေစဉ်တွင် ရေစိုအဝတ်ဖြင့် သန့်စင်ခြင်း မပြုလုပ်ပါနှင့်။

(၂) Filters လေစစ်စကာများကို ဖြုတ်ပြီး ထုတ်ပါ။ ဖုန်ခါသန့်စင်ပြီး ချွတ်ဆေးမပါသော ဆပ်ပြာရည်ထဲတွင် ၂ မိနစ်ခန့် စိမ်ပါ။ ပြီးလျှင် ပိုက်ခေါင်းအောက်မှ ရေဖြင့် ပြန်ဆေးပါ။

အဆင်ပြေလျှင် UV light ခရမ်းလွန် ရောင်ခြည်ပေးစက်ဖြင့် ဖြစ်စေ၊ နေရောင်ထဲမှာဖြစ်စေ မိနစ် ၂၀ ခန့် ထားပြီး ပိုးသတ်ပါ။ လေသလပ်ခံကာ လုံးဝခြောက်သွေ့သွားမှသာ ပြန်လည်တပ်ဆင် သုံးစွဲပါ။ မခြောက်သွေ့သေးဘဲ အသုံးပြုလျှင် စက်အတွင်းသို့ ရေမှုန်ရေမွှား ပါသွားပါက မကောင်းပါ။

အထဲတွင် HEPA လို့ခေါ်သော လေစစ်ဇကာကို သေချာဖြုတ်ပြီး ဘရပ်ရှ်ဖြင့် သန့်စင်ပါ။

ထွက်လာသော ဖုန်ထဲတွင် လူနာမှရှုထုတ်ထားသည့် ဗိုင်းရပ်စ်ပိုးများ ကပ်နေနိုင်တာကြောင့် mask, face shield/ goggles (အကာအကွယ် မျက်မှန်), လက်အိတ်များ သေချာစွာ ဝတ်ဆင်ပြီးမှ ဖုန်သန့်စင်ပါ။

(၃) လေရှုပြွန် cannula and tubing နှင့် mask ကို နောက်တစ်ယောက် ပြန်မသုံးသင့်ပါ။ နောက်တစ်ယောက်အတွက် အသစ်လဲ၍ သုံးပါ။

လူနာတစ်ယောက်တည်း သုံးလျှင်လည်း လူနာ နေမကောင်းဖျားနာမှု ရှိခဲ့လျှင် cannula နှင့် mask ကို အသစ်လဲလှယ် သင့်ပါသည်။

Cannula ထိပ် နှင့် mask ကို တစ်ယောက်တည်း သုံးလျှင်တောင်မှ ကြမ်းပြင်၊ စားပွဲခုံ၊ အိပ်ရာပေါ် စသည်တို့ အပေါ်မှာ မချမိစေဖို့ ဂရုပြုပါ။ ထိုသို့ချမိပါက ရောဂါပိုးကိုသာ ရှုရှိုက်မိသလို ဖြစ်စေပါသည်။

မျက်နှာပြင် တစ်ခုခုပေါ် ချမိလျှင် Cannula ထိပ် နှင့် mask ကို ဆပ်ပြာရည်ပါသော ရေနွေးထဲမှာစိမ်ပါ။ ပြီးလျှင် ရေဖြင့်ဆေးပြီး Antiseptic solution ပိုးသတ်ဆေးရည် ထဲတွင် မိနစ် ၃၀ စိမ်ပါ။

မရှိလျှင် (white vinegar) အဖြူရောင် လျှာလကာရည် ၁ ဆ - ရေ ၃ ဆ ပါသော ရေနွေးထဲတွင် မိနစ် ၂၀ စိမ်ပါ။ ခြောက်သွေ့အောင် သုတ်ပြီးမှ သုံးပါ။ UV light (သို့မဟုတ်) နေရောင်ထဲ ထားပြီးလည်း ပိုးသတ်နိုင်ပါသည်။

Tubing ပြွန်ရှည်ကို လုံးဝ ရေမစိမ်ရပါ။

ပြွန်ထဲရေဝင်သွားလျှင် ခြောက်သွေ့ရန် မလွယ်ကူတော့ပါ။

(၄) ရေအိုး water trap humidifiers ကိုလည်း အပေါ်က နည်းအတိုင်း ဆေးကြောနိုင်ပါသည်။ ၅ ရက် တစ်ခါလောက် ဆေးပေးပါ။ လူနာပြောင်းတိုင်းလည်း ပိုးသတ်ပေးပါ။

Antiseptic solution ပိုးသတ်ဆေးရည်ရှိလျှင် ထိုအရည်ထဲတွင် မိနစ် ၃၀ခန့် စိမ်ပါ။

Humidifier ပလတ်စတစ်ဘူးထဲ ထည့်မည့်ရေသည် ရေသန့် ဖြစ်ရပါမည်။ ကြိုချက်ထားသော ရေသန့်ဖြစ်လျှင် ပိုကောင်းပါသည်။ နေ့စဉ် ရေအသစ် လဲလှယ်ပေးပါ။

ရေမသန့်၊ ဘူးမသန့်ခဲ့လျှင် mucormycosis လို့ခေါ်သော Covid လူနာအတွက် နောက်ဆက်တွဲ မှိုနက်ရောဂါ ဖြစ်တတ်ပါသည်။