ပိုးသတ်ခြင်းကို မလုပ်ဆောင်မီ PPE, N95 mask, လက်အိတ်, မျက်နှာ အကာအကွယ် (face shield, glasses or goggles) များကို စနစ်တကျ ဦးစွာဝတ်ဆင်ရန် လိုအပ်ပါသည်။

PPE ဝတ်စုံအား စနစ်တကျ ဝတ်ခြင်း နည်းလမ်းကို အောက်ပါ video clip တွင်ကြည့်ရှုနိုင်ပါသည်။

ထို့နောက် ပိုးသတ်ဆေးပစ္စည်း (bleach solutions) ကို သတ်မှတ်ထားသော အချိုးအစားအတိုင်း ဖျော်ရန်လိုအပ်ပါသည်။ မိမိအသုံးပြုမည့် ပိုးသတ်ဆေးပစ္စည်း အညွှန်းများကို အသုံးမပြုမီ သေချာစွာ ဖတ်ရန်လိုအပ်ပါသည်။

ပိုးသတ်ဆေးရည် ဖျော်စပ်နည်း

၅% အိမ်သုံးအရောင်ချွတ်ဆေး (bleaching powder) လက်ဘက်ရည်ဇွန်း ၄ဇွန်း (သို့မဟုတ်) Dettol အရည် အဖုံး ၁ခွက် ကို ရေ ၁လီတာ နှင့် ရော၍ ပိုးသတ်ဆေးရည် ဖျော်စပ်နိုင်ပါသည်။

ညစ်ပတ်နေသော နေရာများ၊ ပစ္စည်းများကို ပိုးသတ်ဆေး မဖြန်းမီ ဆပ်ပြာ၊ detergent များဖြင့် အရင် ဆေးကြောရန် လိုအပ်ပါသည်။

ထို့နောက် လူနာ၏ နေရာ၊ အသုံးပြုခဲ့သောပစ္စည်းများကို ပိုးသတ်ဆေးဖြန်းရပါမည်။

အိမ်တွင် နေ့စဉ်ထိတွေ့မှု အများ ဆုံးနေရာ

(ဥပမာ- တံခါးလက်ကိုင်၊ စားပွဲများ၊ မီးဖွင့်/ပိတ် ခလုပ်များ၊ မီးဖိုချောင် မျက်နှာပြင်များ၊ အိမ်သာကြမ်းပြင်) နှင့် ဧည့်သည် လာပြီးတိုင်း ထိတွေ့ အသုံးပြုခဲ့သော နေရာ၊ ပစ္စည်းများကို သန့်ရှင်းရေး ပြုလုပ်ရပါမည်။

ကော်ဇော၊ ကြမ်းခင်း၊ ဆိုဖာမျက်နှာပြင်ကဲ့သို့ ပျော့ပြောင်းသော မျက်နှာပြင်များ သန့်ရှင်းရေး ပြုလုပ်ပါက ရေနှင့်ဆပ်ပြာ သိုမဟုတ် ထိုအရာများ အတွက် အထူးပြုလုပ်ထားသော သန့်ရှင်းရေး ပစ္စည်းများဖြင့် ဆေးကြောသန့်စင်ရန် လိုအပ်ပါသည်။

တကိုယ်ရည် နေ့စဉ်အသုံးပြုသော electronics devices မျက်နှာပြင်များ (လက်ကိုင်ဖုန်း၊ tablets၊ touchscreen၊ keyboards၊ remote control) များကိုလည်း အသုံးပြုပြီးတိုင်း alcohol wipes များဖြင့် သန့်ရှင်းရေး ပြုလုပ်ရန် လိုအပ်ပါသည်။

ပိုးသတ်နေချိန်တွင် လူနာ၏ အခန်းများ၊ မိမိအိမ်အတွင်းရှိ တံခါးများဖွင့်ခြင်း၊ ပန်ကာများ ဖွင့်ထားခြင်းများပြုလုပ်ပြီး အိမ်တွင်း လေဝင်လေထွက်ကောင်းစေရန် ပြုလုပ်ထားရန်လည်း လိုအပ်ပါသည်။

ပိုးသတ်ဆေး (disinfectants) များကို သောက်သုံးခြင်း၊ ရှူခြင်း၊ ရေချိုးခြင်း၊ တိရိစ္ဆာန်များအားဖြန်းခြင်း၊ အရေပြားများ အပေါ် ပတ်ဖြန်းခြင်းကို ရှောင်ရှားရပါမည်။

ပိုးသတ်ပြီးနောက် PPE, mask, လက်အိတ် များကို နည်းလမ်းတကျ ချွတ်ပါ။ လက်ကို hand sanitizer / alcohol 60% ပါသော လက်သန့်ဆေးဖြင့် စက္ကန့် ၂၀ ကြာအောင် နည်းလမ်းမှန်စွာ ဆေးကြောရပါမည်။ ပြီးနောက် ရေချိုးသန့်စင်ခြင်းကို ပြုလုပ်သင့်ပါသည်။

PPE ဝတ်စုံအား စနစ်တကျ ချွတ်ခြင်း နည်းလမ်းကို အောက်ပါ video clip တွင်ကြည့်ရှုနိုင်ပါသည်။

အသုံးပြုခဲ့သော PPE ပစ္စည်းများကို စနစ်တကျ ထုပ်ပိုးပြီး အမှိုက်ကိုစနစ်တကျ ခွဲခြားပစ်ရန် လိုအပ်ပါသည်။

ကျန်းမာရေးဝန်ကြီးဌာန၊ အမျိုးသားညီညွတ်ရေးအစိုးရ (NUG-MOH) မှ ညွှန်ကြားချက်များ